Eat mindfully

#حاجة_جديدة قررت كل يوم أتعلم حاجة جديدة وأحاول أعلمها للناس eat mindfully ترجمة المصطلح حرفيا يعني« تأكل بكامل عقلك » ايه دا هو طريقة الأكل في العالم اتغيرت؟ 😂 لا طبعا انت وانتي كشخص بيحب يحافظ على وزنه الصحي (ربنا يوعدنا)😉 او بيحاول يخس (حاذي في الصف منك لها) 😅 ساعات نفسك الأمارة بالسوء دي تقولك نفسي آكل جاتوه، طب فتفوتة شوكولاتة، بولة آيس كريم واتوب بعدها طبعا انت كشخص واعي وناضج بترفض (يا دي أحلام اليقظة ) 😇 المهم مطولا عليكم المصطلح الغريب دهون معناه مش تقفل بقك وتأكل بعقلك، دار معناه كل بكل جوارحك صبرك بالله هفهمك الناس الغريبة دي بتقولك اننا بناكل بمشاعرنا عشان كده معظم الناس اللي بتعاني السمنة اصلا بتعاني من جوع عاطفي اسم الله على مقامك اللي هو حضرتك محتاج حضن اضرب مولتو، محتاج تقدير الشوكولاتة هتقوم بالواجب محتاج تعاطف الجاتوه حلو أوي في التعاطف حضرتك لسة مش فاهم؟😬 يا ستي الله يخليكي بار الشوكولاتة اللي محتاج مرتب على مرتبك دا مش زمارة رقبة جوزك😯 وورك الفرخة اللي اتضرب 12 بالليل مش دراع حماتك 😈 والبيتزا بتاعت الأسبوع اللي فات مش هتغير نتيجة عيالك في الامتحان أقسم بالله😡 وكوبايتين السحلب بتوع بالليل مش هيخلوا الكراش بتاعك يحس على دمه يا خايبة الأكل مش حل لمشاكلك بالعكس المشكلة الأكبر انك تأكل وانت تحت تأثير مشاعرك طب احنا هناكل الحاجة الحلوة دي ونستمتع بيها إزاي اذا كانت مجرد وسيلة لتفريغ مشاعرنا الحل في حاجتين: خد الحاجة الحلوة دي في الفطار ودا حل حلو أوي او كلها وانت مركز #mindfully😍 حتة الجاتوه اللي هتتاكل على قطمتين خليها على 10 وكل مرة تحط حتة منها تدوقها وتستمع وانت بتفكر هي عشان تبقى حتة جاتوه مرت بمراحل قد ايه، عدت على كام ايد قبل ما توصلك، كام واحد ساعد أنها تجيلك شكلها حلو وطعمها حلو، الناس دول تفتكر داقوا حتة جاتوه زي دي قبل كده ؟😊 كل وانت معتبر الأكل نعمة مش وسيلة لتفريغ شحنة مشاعرك والانتقام من صحتك يا رب أكون وصلت الفكرة صح ويا رب أكون قدمت معلومة مفيدة #هالة