#معلومة_جديدة
#مثلث برمودا
طبعا انتي متابعة يا أختي وعارفة ان اي حاجة هتكلم عنها مالهاش علاقة بمعلوماتك عنها 😉
اه ياختشي حفظت خلاص 😣
بصي انا عاوزة اكلمك النهاردة على مثلث برمودا 😊
اسكتي مش بيقولوا طلع كدبة 😞
لما هو كدبة هتدوشيني ليه دلوقت ؟😬
ما قلنا هتكلم عنه بشكل مختلف😉
هتكلم عن مثلث برمودا اللي في حياتك اللي بيبلع كل سفن السعادة 😢
اه عرفته ياختي😕
لا مش اللي جه في بالك خالص
المثلث دا خاص بيكي محدش بيدخل ولا يخرج حاجة منه غيرك
وبما انك متعرفيش عنه حاجة فأنا هشرحهولك بطريقة بسيطة على قد ما اقدر
ركزي بقى زي إسعاد يونس في مسرحية عروسة تجنن وربّطي صواميل الفهم إلهي يسعدك 👏
هتلاقي في الصورة دي رسمة مثلث كل ضلع من اضلاعه هنكتب عليه حاجة بتأثر على حياتك
مبحبش الرياضة انا خليها حصة تاريخ او جغرافيا دا حتى انا حافظة كل حاجات ناشيونال جيوغرافيك😊
ياستي ركزي دي جغرافية حياتك اللي انا بشرحها دلوقت مش جبر ولا هندسة 😭
خلي عيل من عيالك يرسملك مثلث دا ايه المرار دا يا ربي
خلاص ربعت ايدي اهو قولي ياختي كلي أذان مطرطقة😳
المثلث هنكتب على الضلع اليمين الحاجات اللي بتعمليها غصب وبتحسسك انك مضغوطة وزعلانة ونرسم سهم نازل لتحت
وحضرتك زي الشاطرة ترصي الحاجات دي جنب الضلع دا
انا بالنسبالي شغل البيت والمذاكرة ومشاوير المجاملات من اهم الحاجات اللي بعملها متكدرة وبتمتص طاقتي النفسية 😢
شوفي انتي بقى ايه الحاجات اللي تخصك
قاعدة المثلث هنكتب فيها الحاجات اللي بتسعدك بس بطلتي تعمليها او معندكيش وقت ليها 😢
الرياضة الخروجات السينما لمة الصحاب
براحتك وكتري في الحاجات دي دوري بذمة يعني😞
الضلع الاخير اللي سهمه طالع لفوق هو اللي هنكتب جنبه الحاجات اللي بتعمليها وتبقي مبسوطة بتعمليها فعلا وبتدي طاقة إيجابية ليكي
قرآن قراءة كلام كتابة افلام اغاني وكتري برضو
ايه الفايدة من اللي عملناه دلوقت؟🤔
بداية عرفتي ايه الحاجات اللي بتسعدك وايه ممكن يسعدك وانتي ناسياه
تاني حاجة ممكن تاخدي من ضلع الطاقة الإيجابية حاجات نعملها مكس مع حاجات في ضلع الطاقة السلبية
زي مثلا اسمعي قرآن وانتي بتغسلي المواعين
او شغلي مزيكا وانتي بتنضفي البيت
طبعا دا مثلثك وانتي حرة
تالت حاجة بقى الحاجات اللي بطلتي تعمليها وبتسعدك اختاري منها كل فترة حاجة ننقلها لضلع الطاقة الإيجابية وبالراحة كده عشان متبوظيش حاجة ولا تكسري حاجة 😂
ذا معناه انك هتزودي مصادر سعادتك
ودعواتك بقى وانتي سعيدة 😊
يا رب أكون قدرت أشرح الفكرة
زيا رب أكون قدمت معلومة مفيدة
#هالة
